1. Mazkur Nizom Toshkent viloyatining Ohangaron tumanida tashkil etilgan mis va noyob metallarni qayta ishlash orqali yuqori qo‘shilgan qiymatli mahsulotlar ishlab chiqarishga qaratilgan “Ohangaron Tech Industrial” texnoparki ishtirokchilarining innovatsion, ilmiy-tadqiqot ishlari va tajriba-konstruktorlik ishlanmalariga sarflagan xarajatlarini O‘zbekiston Respublikasi respublika budjeti hisobidan qoplab berish tartibini belgilaydi.

2. Mazkur Nizomda quyidagi asosiy tushunchalardan foydalaniladi:

ishchi organ — Tog‘-kon sanoati va geologiya vazirligi huzuridagi Geologiya, kon-metallurgiya va misni qayta ishlash sanoatini rivojlantirish loyiha ofisi;

vakolatli organ — Oliy ta’lim, fan va innovatsiyalar vazirligi huzurida Innovatsion rivojlanish agentligi;

axborot portali — Tog‘-kon sanoati va geologiya vazirligi huzuridagi Geologiya, kon-metallurgiya va misni qayta ishlash sanoatini rivojlantirish loyiha ofisining Mis sanoati klasteri bo‘yicha yagona elektron axborot-interaktiv savdo portali;

Texnopark — Toshkent viloyatining Ohangaron tumanida mis va noyob metallarni qayta ishlash orqali yuqori qo‘shilgan qiymatli mahsulotlarni ishlab chiqarishga qaratilgan “Ohangaron Tech Industrial” texnoparki;

Texnopark ishtirokchisi — O‘zbekiston Respublikasi Prezidentining 2021-yil 24-iyundagi PQ-5159-son qarori bilan tasdiqlangan Mis sanoati klasterini tashkil etish va rivojlantirish bo‘yicha maxsus komissiya tomonidan qabul qilingan qarorga asosan “Ohangaron Tech Industrial” texnoparki hududida ishlab chiqarish (ishlarni bajarish, xizmat ko‘rsatish) faoliyatini amalga oshiruvchi xo‘jalik yurituvchi subyekt;

ilmiy tadqiqot ishlari va tajriba-konstruktorlik ishlanmalari — mis va noyob metallar xom ashyosini qayta ishlash borasida energiya va suv resurslaridan samarali foydalanish, mehnat unumdorligini oshirish, ekologiya xavfsizligini ta’minlash, ishlab chiqarish va mahsulot sifatini axborot tizimlari orqali boshqarish va nazorat qilish bo‘yicha ilmiy-tadqiqot ishlari va tajriba-konstruktorlik ishlanmalari;

loyihalashtirish, injiniring va texnologiyalar transferi xizmatlari (ishlari) — mis va noyob metallar xom ashyosini qayta ishlash borasida energiya va suv resurslaridan samarali foydalanish, mehnat unumdorligini oshirish, ekologiya xavfsizligini ta’minlash, ishlab chiqarish va mahsulot sifatini axborot tizimlari orqali boshqarish va nazorat qilish bo‘yicha ilmiy-tadqiqot ishlari va tajriba-konstruktorlik ishlanmalarni joriy qilish bo‘yicha loyihalashtirish, injiniring va texnologiyalar transferi xizmatlari (ishlari);

ilmiy tadqiqot ishlari va tajriba-konstruktorlik ishlanmalariga sarflangan xarajatlarni qoplash — mis va noyob metallar xom ashyosini qayta ishlash borasida energiya va suv resurslaridan samarali foydalanish, mehnat unumdorligini oshirish, ekologiya xavfsizligini ta’minlash, ishlab chiqarish va mahsulot sifatini axborot tizimlari orqali boshqarish va nazorat qilish bo‘yicha ilmiy-tadqiqot ishlari va tajriba-konstruktorlik ishlanmalariga sarflangan xarajatlarning 50 foiz miqdori, biroq 1 mlrd so‘mdan oshmaydigan qismini O‘zbekiston Respublikasi respublika budjeti hisobidan qoplab berish;

loyihalashtirish, injiniring va texnologiyalar transferi xizmatlarini ko‘rsatish (ishlarni bajarish) bilan bog‘liq xarajatlarni qoplash — mis va noyob metallar xom ashyosini qayta ishlash borasida energiya va suv resurslaridan samarali foydalanish, mehnat unumdorligini oshirish, ekologiya xavfsizligini ta’minlash, ishlab chiqarish va mahsulot sifatini axborot tizimlari orqali boshqarish va nazorat qilish bo‘yicha ilmiy-tadqiqot ishlari va tajriba-konstruktorlik ishlanmalarini joriy qilish bo‘yicha loyihalashtirish, injiniring va texnologiyalar transferi xizmatlarini ko‘rsatish (ishlarni bajarish) bilan bog‘liq xarajatlarning 20 foizigacha miqdorini O‘zbekiston Respublikasi respublika budjeti hisobidan qoplab berish;

murojaat — Texnopark ishtirokchisining ilmiy-tadqiqotlar ishlari va tajriba-konstruktorlik ishlanmalariga sarflangan hamda loyihalashtirish, injiniring va texnologiyalar transferi xizmatlarini ko‘rsatish (ishlarni bajarish) bilan bog‘liq xarajatlarni O‘zbekiston Respublikasi respublika budjeti hisobidan qoplab berish to‘g‘risidagi murojaati.

3. Texnopark ishtirokchisining Texnopark hududida ishlab chiqarish (ishlarni bajarish, xizmat ko‘rsatish) faoliyati doirasida ilmiy-tadqiqot ishlari va tajriba-konstruktorlik ishlanmalari hamda loyihalashtirish, injiniring va texnologiyalar transferi xizmatlarini ko‘rsatish (ishlarni bajarish) bilan bog‘liq xarajatlarini qoplash tartibi ushbu Nizomga 1 va 2-ilovalardagi sxemaga muvofiq amalga oshiriladi.

4. Texnopark ishtirokchisi Texnopark hududida ishlab chiqarish (ishlarni bajarish, xizmat ko‘rsatish) faoliyati doirasida ilmiy-tadqiqot va tajriba-konstruktorlik ishlanmalarini joriy etganligi vakolatli organ tomonidan tasdiqlanganligi ushbu ilmiy-tadqiqot ishlari va tajriba-konstruktorlik ishlanmalarini joriy etish bilan bog‘liq xarajatlarini O‘zbekiston Respublikasi respublika budjeti hisobidan qoplab berish uchun asos bo‘ladi.

Bunda Texnopark ishtirokchisi:

yuridik shaxs sifatida davlat ro‘yxatidan o‘tganligi hamda Texnopark ishtirokchisi bo‘lishi;

mis va noyob metalllar xom ashyosini qayta ishlash va tayyor mahsulot ishlab chiqarishni o‘zlashtirganligi;

ilmiy-tadqiqot ishlari va tajriba-konstruktorlik ishlanmalarini yaratish bilan bevosita bog‘liq bo‘lgan xarajatlarni tasdiqlovchi hujjatlarga ega bo‘lishi;

ilmiy-tadqiqot ishlari va tajriba-konstruktorlik ishlanmalarini majburiy sertifikatlash talab etilgan hollarda muvofiqlik sertifikati, shuningdek, zarur hollarda texnik jihatdan tartibga solish sohasidagi normativ hujjatlar yoki ekologik ekspertiza xulosasiga ega bo‘lishi;

ilmiy-tadqiqot ishlari va tajriba-konstruktorlik ishlanmalarini qonunchilik hujjatlariga muvofiq litsenziyalash yoki boshqa ruxsat etish xususiyatiga ega bo‘lgan hujjat talab etilgan hollarda litsenziya yoki ruxsat etish xususiyatiga ega boshqa hujjatlarga ega bo‘lishi lozim.

5. Texnopark ishtirokchisi ilmiy-tadqiqot ishlari va tajriba-konstruktorlik ishlanmalari bilan bog‘liq xarajatlarni qoplash uchun axborot portali orqali ishchi organga quyidagi hujjatlarni ilova qilgan holda murojaat etadi:
6. a) murojaatchi to‘g‘risida ma’lumot (pochta manzili, STIR, telefon (faks) raqami, xizmat ko‘rsatuvchi tijorat banki nomi hamda bankdagi hisobvaraq raqami);
7. b) ilmiy-tadqiqot ishlari va tajriba-konstruktorlik ishlanmalari to‘g‘risidagi ma’lumotlar;
8. v) ilmiy-tadqiqot ishlari va tajriba-konstruktorlik ishlanmalarining funksional vazifasi, texnik xususiyati, sifat xususiyatlari, kimyoviy, fizik, mexanik va boshqa xususiyatlari hamda zaruratga ko‘ra sifatini tasdiqlovchi hujjatlar;
9. g) ilmiy-tadqiqot ishlari va tajriba-konstruktorlik ishlanmalarini yaratish bilan bevosita bog‘liq bo‘lgan xarajatlarni tasdiqlovchi hujjatlar (hisobvaraq-faktura, xarajatlar smetasi va boshqalar).
10. Ishchi organ murojaat kelib tushgan kundan boshlab besh ish kunida murojaat ushbu Nizomning 4 va 5-bandi talablari asosida taqdim etilganligini tekshiradi va natijasi bo‘yicha:

hujjatlar to‘liq taqdim etilmagan taqdirda, kamchiliklarni bartaraf etish uchun hujjatlarni axborot portali orqali murojaatchiga qaytaradi va bu haqda uni xabardor etadi;

hujjatlar to‘liq taqdim etilgan taqdirda, vakolatli organga axborot portali orqali so‘rovnoma yuboradi.

7. Vakolatli organ so‘rovnoma kelib tushgan kundan boshlab o‘n besh ish kunida so‘rovnomani o‘rganib chiqadi va natijasi bo‘yicha ishchi organga axborot portali orqali ilmiy ekspertiza xulosasini taqdim etadi.

Bunda murojaatchi tomonidan joriy etilgan ilmiy-tadqiqot ishlari va tajriba-konstruktorlik ishlanmasi ushbu Nizomning 4-bandida nazarda tutilgan mezonlarga javob bermasa, asoslantirilgan axborot taqdim etadi.

8. Ishchi organ vakolatli organ tomonidan taqdim etilgan ilmiy ekspertiza xulosa kelib tushgan kundan boshlab besh ish kunida axborot portali orqali Iqtisodiyot va moliya vazirligiga Texnopark ishtirokchisiga ilmiy-tadqiqot ishlari va tajriba-konstruktorlik ishlanmasini yaratish bilan bevosita bog‘liq bo‘lgan xarajatlarni O‘zbekiston Respublikasi respublika budjeti hisobidan qoplab berish to‘g‘risida so‘rovnoma yuboradi.

9. Iqtisodiyot va moliya vazirligi so‘rovnoma kelib tushgan kundan boshlab bir oy muddatda ilmiy-tadqiqot ishlari va tajriba-konstruktorlik ishlanmasini yaratish bilan bevosita bog‘liq bo‘lgan xarajatlarni Texnopark ishtirokchisi murojaatida keltirilgan bankdagi hisobvaraqqa O‘zbekiston Respublikasi respublika budjeti hisobidan qoplab beradi.

10. Texnopark ishtirokchisi Texnopark hududida ishlab chiqarish (ishlarni bajarish, xizmat ko‘rsatish) faoliyati doirasida loyihalashtirish, injiniring va texnologiyalar transferi xizmatlarini ko‘rsatishni (ishlarni bajarishni) joriy etganligi vakolatli organ tomonidan tasdiqlangandan so‘ng ushbu loyihalashtirish, injiniring va texnologiyalar transferi xizmatlarini (ishlarini) joriy etish bilan bog‘liq xarajatlar O‘zbekiston Respublikasi respublika budjeti hisobidan qoplab berish uchun asos bo‘ladi.

Bunda Texnopark ishtirokchisi:

yuridik shaxs sifatida davlat ro‘yxatidan o‘tganligi hamda Texnopark ishtirokchisi bo‘lishi;

mis va noyob metalllar xom ashyosini qayta ishlash va tayyor mahsulot ishlab chiqarishda loyihalashtirish, injiniring va texnologiyalar transferi xizmatlarini ko‘rsatayotganligi (ishlarni bajarayotganligi);

loyihalashtirish, injiniring va texnologiyalar transferi xizmatlarini ko‘rsatishni (ishlarni bajarishni) joriy etish bilan bevosita bog‘liq bo‘lgan xarajatlarni tasdiqlovchi hujjatlarga ega bo‘lishi;

loyihalashtirish, injiniring va texnologiyalar transferi xizmatlarini ko‘rsatish (ishlarni bajarish) bo‘yicha majburiy sertifikatlash talab etilgan hollarda muvofiqlik sertifikati, shuningdek, zarur hollarda texnik jihatdan tartibga solish sohasidagi normativ hujjatlar yoki ekologik ekspertiza xulosasiga ega bo‘lishi;

loyihalashtirish, injiniring va texnologiyalar transferi xizmatlarini ko‘rsatish (ishlarni bajarish) qonunchilik hujjatlariga muvofiq ruxsat etish xususiyatiga ega boshqa hujjatlarga ega bo‘lishi lozim.

11. Texnopark ishtirokchisi loyihalashtirish, injiniring va texnologiyalar transferi xizmatlarini ko‘rsatishi (ishlarni bajarishi) bilan bog‘liq xarajatlarni qoplash uchun axborot portali orqali ishchi organga quyidagi hujjatlarni ilova qilgan holda murojaat etadi:
12. a) murojaatchi to‘g‘risida ma’lumot (pochta manzili, STIR, telefon (faks) raqami, xizmat ko‘rsatuvchi tijorat banki nomi hamda bankdagi hisobvaraq raqami);
13. b) loyihalashtirish, injiniring va texnologiyalar transferi xizmatlarini ko‘rsatish (ishlarni bajarish) to‘g‘risidagi ma’lumotlar;
14. v) loyihalashtirish, injiniring va texnologiyalar transferi xizmatlarini ko‘rsatish (ishlarni bajarish) funksional vazifasi va boshqa xususiyatlari hamda zaruratga ko‘ra sifatini tasdiqlovchi hujjatlar;
15. g) loyihalashtirish, injiniring va texnologiyalar transferi xizmatlarini ko‘rsatishni (ishlarni bajarishni) yo‘lga qo‘yish bilan bevosita bog‘liq bo‘lgan xarajatlarni tasdiqlovchi hujjatlar (hisobvaraq-faktura, xarajatlar smetasi va boshqalar).
16. Ishchi organ murojaat kelib tushgan kundan boshlab besh ish kunida murojaat ushbu Nizomning 11 va ushbu band talablari asosida taqdim etilganligini tekshiradi va natijasi bo‘yicha:

hujjatlar to‘liq taqdim etilmagan taqdirda, kamchiliklarni bartaraf etish uchun hujjatlarni axborot portali orqali murojaatchiga qaytaradi va bu haqda uni xabardor etadi;

hujjatlar to‘liq taqdim etilgan taqdirda, vakolatli organga axborot portali orqali so‘rovnoma yuboradi.

13. Vakolatli organ so‘rovnoma kelib tushgan kundan boshlab o‘n besh ish kunida so‘rovnomani o‘rganib chiqadi va natijasi bo‘yicha ishchi organga axborot portali orqali ilmiy ekspertiza xulosasini taqdim etadi.

Bunda murojaatchi tomonidan joriy etilgan loyihalashtirish, injiniring va texnologiyalar transferi xizmatlarini ko‘rsatish (ishlarni bajarish) ushbu Nizomning 10-bandida nazarda tutilgan mezonlarga javob bermasa, asoslantirilgan axborot taqdim etadi.

14. Ishchi organ vakolatli organ tomonidan taqdim etilgan ilmiy ekspertiza xulosasi kelib tushgan kundan boshlab besh ish kunida axborot portali orqali Iqtisodiyot va moliya vazirligiga Texnopark ishtirokchisiga loyihalashtirish, injiniring va texnologiyalar transferi xizmatlarini ko‘rsatishni (ishlarni bajarishni) joriy etish bilan bevosita bog‘liq bo‘lgan xarajatlarni O‘zbekiston Respublikasi respublika budjeti hisobidan qoplab berish to‘g‘risida so‘rovnoma yuboradi.
15. Iqtisodiyot va moliya vazirligi so‘rovnoma kelib tushgan kundan boshlab bir oy muddatda loyihalashtirish, injiniring va texnologiyalar transferi xizmatlarini ko‘rsatishni (ishlarni bajarishni) joriy etish bilan bevosita bog‘liq bo‘lgan xarajatlarni Texnopark ishtirokchisi murojaatida keltirilgan bankdagi hisobvaraq raqamiga O‘zbekiston Respublikasi respublika budjeti hisobidan qoplab beradi.

16. Ishchi organga taqdim etilgan axborot va hujjatlarning haqqoniyligi va to‘g‘riligi uchun ularni taqdim etganlar mas’ul va javobgar bo‘ladilar.
17. Ushbu Nizom talablari buzilishida aybdor bo‘lgan shaxslar qonunchilik hujjatlarida belgilangan tartibda javobgar bo‘ladilar.